More Nevuchim

Dr More Nevuchim (hebräisch מורה נבוכים, ursprünglig arabisch دلالة الحائري, Dalālat alḥā’irīn, dütsch Füerer vo dene, wo nid druschömme) isch s filosofische Hauptwärk vom middelalterlige jüüdische Gleerte Maimonides. S Original isch uf Judeo-Arabisch verfasst worde, s Wärk isch aber under sim hebräische Ditel More Nevuchim bekannt.

Es basiert uf dr jüüdisch-kalamitische Theologii und dr peripatetische-avicennische Filosofii und beziet Stellig zu grundlegende religiöse und filosofische Frooge. Es hätt in erster Linie sölle bewiise, ass die jüdischi Dradizioon dr Vernumfterkenntnis entspricht, wenn si richdig unterbretiert wird – also wemm mä Acht git uf die unvermiidbari Bildligkäit vo dr Sprooch, au vo dere in dr Bible.

S Wärk het e riisige Iifluss uf s Dänke vo dr jüüdische Noochwält ghaa und au muslimischi und christligi Filosoofe und Theologe häi s as Richtschnuer brucht. Under de Juude isch dr Maimonides vo orthodoxe Gegner heftig bekämpft worde („Maimonidesstrit”, „Antimaimuniste”), nit zletscht, wil si Versuech, d Bible mit dr Filosofii z versööne, as Wääg äwäg vo dr Bible und aane zur Filosofii verstande worde isch.